Хуадонты Мæдинæ Змейкæйы посты бастдзинады хайады сæргълæууæгæй нырма æрæгæй нырмæ кусы. Сарæхсдзæн, уый та, фыццаджыдæр, постхæсджытимæ дзурын кæй базыдта, уымæй дæр рабæрæг. Цыппар сылгоймаджы йын сты. Дыууæ Татьянæйы — Истомина æмæ Мæргъиты, Музайты Фатимæ, Светланæ Липова.

 

Постхæссæджы хъуыддаг рагон у. Иу цалдæр æнусмæ дæр йæ куысты æгъдау нæ ивы. Боны ахаст ницæмæ даргæйæ, раздæрау уынгты хæдзаргай алыхуызон мыхуыры продукци уары. Уымæй уæлдай ма пенситæ ратты. Куы бахъæуы, уæд газеттæ æмæ журналтæ йæ сыхты цæрджытæн рафыссы.

Постхæсджытæй алкæмæн дæр йæ зылды ис, дуканимæ рацæуын чи нал фæразы, ахæм хистæртæ. Газеттæ дæр уыдон фылдæр рафыссынц. Фæлæ ма сæм æндæр ныстуантæ дæр разыны. Зæгъæм, рухсæн, донæн, газæн афоныл бафидын. Дуканийæ сын кæм сæкæры, кæм цæххы къопп æрбахæссын.

Бастдзинады хайадмæ алыхуызон фарстатимæ чи æрбацæуы, Мæдинæ уыцы адæммæ байхъусын дæр зоны. Уавæрмæ гæсгæ сын хуыздæр цы у, уый бацамоны. Змейкæйы цæрджытæ йæм уыцы хорздзинад уайтагъд раиртæстой. Уымæн æмæ бæрнон бынаты уæлæнгай цæстæнгас нæ бæззы.

Ног кусæг æвæлтæрд вæййы. Мæдинæ газеттæ æмæ журналтæ рафыссыны хъуыддагмæ ацы азы дыккаг æмбисмæ ноджы парахатдæр мадзæлттæй бавналдзæн. Бон цæуы æмæ йемæ фарн хæссы. Йæ размæ стыр нысантæ æвæры. Хъæуы цæрджытæ газеттæ фылдæр исын кæй райдайдзысты, уый йæ уырны.

---

ДЗУЦЦАТЫ Къоста.