Æрцыдысты та нæм Уастырджийы æвзæрст бонтæ. Дзаджджын хуынтимæ, зæрдæхъæлдзæгæй æгасцуай зæгъæм хæрзæмбæлæг, æмгæртты сæр, богæлтты ныфс, фæндаггæтты фæндарастгæнæг рагон зæдæн.

Джеоргуыбайы æбæркадæй ничи баззайдзæн. Кæд ныртæккæйы зын заман адæмæй бирæтæ цыбыркъух сты, уæддæр сæ фынгтæ къæбицы фæрныгадæй æртасдзысты. Табуйаг æртæ уæливыхы нывонд кусарты фыдимæ уыдзысты алы хæдзары дæр.

Зынаргъ хæлæрттæ! Уастырджийы фæдзæхст ут! Чи фистæг у, кæмæ та æфсæн бæх ис. Фæндаггæттæн сæ цалх æдас рæтты куыд тула, ахæм арфæ районы, Ирыстоны цæрæг адæмæн ракæнæд!

Абон нæ мæт — нæ фæсивæд, нæ мадæлон æвзаг, адæмы æнгомдзинад. Уастырджийы фарнæй уыцы хъуыддаджы нæ къухты стыр æнтыстдзинæдтæ куыд æфта, ахæм хорзæх нæ уæд! Кæрæдзи куы æмбарæм, кæрæдзи куы уарзæм, уæд нæм алцыдæр уыдзæн.

Ирыстон — нæ зæдбадæн бæстæ. Йæ кадыл кусæг, йе 'гъдауыл мæлæг стæм, æмæ æнустæм дидинæг æфтауæд! Йæ адæмты хæлардзинадæй зæххы цъарыл бæрæг куыд дара, ахæм арфæ нæ уæд!

Бæрæгбоны хорзæх  уæ уæд, нæ зынаргъ адæм!

---

НÆКУЫСАТЫ Барис, муниципалон равзæрд Кировы районы Сæргълæууæг, минæвæртты Æмбырды сæрдар;

БАТИАТЫ Хъазыбег, муниципалон равзæрд Кировы районы бынæттон хиуынаффæйады Администрацийы Сæргълæууæг.