Æрæджы Елхоты сывæллæтты фæндзæм цæхæрадоны бындурыл  ирон æвзагыл ацыд гом ахуырадон мадзал  «Ахæм рæсугъд лæппутæ æмæ чызджытæ». Бацæттæ йæ кодта хистæр къорды хъомылгæнæг Засеты Инессæ йæ хъомылгæнинæгтимæ. Ардæм ма хуынд æрцыдысты нæхи æмæ Рахизфарсы районы рæвдауæндæтты ирон æвзаджы хъомылгæнджытæ.

 

Мидисджын  рауад мадзал, æвæрд дзы æрцыдис арф хъуыды: царды фæзилæнты адæймагыл алы цахъхъæнæй дæр — лæппутыл æмæ чызджытыл, нæлгоймæгтыл æмæ сылгоймæгтыл — цы хæстæ æвæрд ис, уый. Хъазты фæрцы сабитæ тынгдæр   банкъардтой уарзондзинад  мадæлон æвзагмæ, не  'гъдæуттæм, сæ сæйраг миниуджытæм — уæздандзинад, ныййарджытæн æмæ  кæрæдзийæн аргъ кæнын, хистæрæн лæггад кæнын. Ам нанайы — сывæллæтты «æххуыс» кæй бахъуыди, уыцы адæймаджы сурæт дзæбæх равдыста хъомылгæнæг Дзæрæхохты Луизæ.

Бæлвырд дзуаппытæ лæвæрдтой гыццыл  лæппутæ æмæ чызджытæ сæ хъомылгæнæджы фæрстытæн, уыимæ адæмы æмхуызондзинад æмæ хицæндзинады æууæлты тыххæй. Лæмбынæг хъуыстой уазджытæ, кæцытæ мадзалæн скодтой хорз аргъ.

— Елхоты ахæм рæсугъд сывæллæтты цæхæрадон кæй ис, уый хорздзинад у, — афтæ райдыдта йæ ныхас Беслæны 16-æм рæвдауæндоны ирон æвзаджы хъомылгæнæг Абойты Фатимæ. — Абоны мадзал нæ зæрдæмæ тынг  фæцыдис. Кæд Инессæ ирон æвзаджы хъомылгæнæг нæу, уæддæр, æнæмæнг, стыр куыст бакодта  йæ сабитимæ.  Йæ къухы бафтыдис йæ размæ æвæрд  хæс — ирондзинадыл сæ ахуыр кæнын. Мæ зæрдæ йын зæгъы йæ дарддæры куысты фылдæр æнтыстдзинæдтæ.

Ирон æвзаг бахъахъхъæнын у нæ риссаг фарста. Нæ сахарты йæм уыйбæрц  сæ хъус нал  дарынц,  æмæ уæ курын, цæмæй йæ хъæуты ма  ферох кæнат, ма йæ бауадзат ныййарджытимæ иумæ мынæг кæнын, уымæн æмæ нæ абоны сабитæ сты нæ  фидæн.

Уазджытæй ма сæ хъуыдытæ загътой Пухаты Тамарæ, Цæллаггаты Луизæ æмæ Пухаты Оксанæ — Рахизфарсы районы рæвдауæндæтты ирон æвзаджы хъомылгæнджытæ. Хъæугæ хатдзæгтæ скодта æмæ йæ фиппаинæгтæ загъта ахуырадон кусджыты цæттæдзинад фæбæрзонддæр кæныны Цæгат Ирыстоны республикон институты ирон æвзаг æмæ литературæйы кафедрæйы ахуыргæнæг Дзанайты Ларисæ дæр.

Фысымты номæй сæ уазджытæн зæрдиаг арфæ  ракодтой рæвдауæндоны сæргълæууæг Æлдаттаты Аллæ, методист Бычерахты Верæ æмæ районы ахуырады Управленийы  сæйраг специалист Хъуылымбегты Альбинæ.

---

 

Тылаттаты С.