Алы аз Ирыстоны цæрджытæ кадджын уавæры сбæрæг кæнынц Хетæгкаты Къостайы гуырæн бон. Ивгъуыд къуыри 15-æм октябры дæр та Нары хъæуы дзырдтой, литературæ, ирон филологи, культурæ, истори æмæ аивады къабæзты Къоста цы хай бавæрдта, ууыл. Нырыккон ирон литературæйы бындурæвæрæджы ном ссарынмæ Нармæ ссыдысты Ираны астæуккаг скъолайы 6 æмæ 7 кълæсты ахуырдзаутæ сæ ахуыргæнджытимæ. Стыр цымыдисæй федтой Къостайы æртæуæладзыгон хæдзар-музей. Фыццаг уæладзыджы уыдысты цардуаджы дзаумæттæ, 19-æм æнусы ирæттæ цы хъæууонхæдзарадон кусæнгæрзтæй пайда кодтой, уыдон.

Дыккаг уæладзыджы музеймæ æрбацæуджытæн йæ кусджытæ дзырдтой ирон адæмы цардуаджы тыххæй. Æртыккæгæм уæладзыджы æвдыст цыдысты Къостайæн йæхи фыст нывты оригиналтæ. Цымыдисаг уыдысты скъоладзаутæн Къостайæн йæ цардыл дзурæг экспонаттæ æмæ нывтæ. Къостайы хæдзары хъуысыдысты ирон музыкæйы мелодитæ, Ирыстоны алы рæттæй скъоладзаутæ кастысты æмдзæвгæтæ æмæ цымыдисон эпизодтæ Къостайы цардæй. Ирайнæгтæ дæр бакастысты Къостайы уацмыстæ æмæ æмдзæвгæтæ.