Æвзæрстыты агъоммæ Елхоты аивадуарзджытæн диссаджы хорз лæвар скодта Кировы районы муниципалон арæзты Администраци — Дзæуджыхъæуæй сын æрхуыдта фæсивæдон театр «Амыран», кæцыйыл алы хатт дæр ам сæмбæлынц æхсызгонæй, уымæн æмæ сын барухс, бахъæлдзæг кæнынц сæ зæрдæтæ сæ диссаджы хъазтæй сценæйы. Ныр дæр та сæ нæ фæфыдæнхъæл кодтой сæ концертон программæйæ.

 

Йæ райдайыны агъоммæ ныхас кодтон театры разамонæг, РЦИ-Аланийы адæмон артист Лазарты Таймуразимæ, æмæ мын афтæ радзырдта:

— Нæ коллективы ис 30 адæймаджы. Уыдонæй иу дæр профессионалон артист нæу. Нæй сæм  сæрмагонд актерон кæнæ режиссурæйы ахуырдзинад. Хистæр фæлтæр сты уæлдæр ахуыры уагдоны ахуыргæнджытæ — наукæты кандидаттæ, доценттæ, аспиранттæ. Фæсивæдæй чи студент у, чи та кусгæ кæны. Иу дзырдæй, театр сын у, сæйраг куыстæй уæлдай, сæ уарзондæр архайд.

Мах Елхотмæ абон æрцыдыстæм районы хицауады хуындмæ гæсгæ. Нæ бавгъау кæндзыстæм нæ курдиат равдисынæн, чи нæм æрбацæуа, уыдонæн. Нæ программæ «Худæгыл ахудæм» арæзт у сатирæ æмæ юморы миниатюрæты бындурыл. 

Æмæ æцæгæйдæр концертон программæйы кæрæй-кæронмæ æвдыст цыдысты цардæй ист æвæрццæг æмæ æппæрццæг нывтæ. Сæ сæйрагдæр темæ уыдис, нозт йæ кæнæгæн дæр кæй нæ бары, уый. Йæ быцъынæг ыл чи тоны, уыдон цы уавæрмæ æрхауынц, маймулийы хуызæттæ куыд свæййынц. Нæ цæстытыл нын ауайын кодтой, горæты трамвайы цæугæйæ, расыг адæймаг йæхи куыд æнæгъдауæй фæдары, йæ фарсмæ чи вæййы, уыдонæй йын бауайдзæфгæнæг куыд нæ вæййы йæ æнæсæрфат миты тыххæй, уый дæр.

Афтæ ирдæй равдыстой расыггæнджыты сурæттæ, æмæ сæм нозтмæ æмхиц чи у, уыдон куы бакастаиккой, уæд дзы сæхи федтаиккой, æмæ сын, чи зоны, зонды хос уыдаид. Залы уæвджытæн та, сæ митæм сценæмæ кæсгæйæ, уыдысты худæджы хос, уæлдайдæр та-иу «расыгæй» пъолыл сæ тъæпп куы ссыди, уæд. Сценæйы расыггæнджыты  æнæсæрфат митæ æвдисын,  кæй зæгъын æй хъæуы,   худæджы хос сты, царды та сты кæуинаг хабæрттæ. 

Тынг дæсны сарæхстысты театры хæдахуыр артисттæ уæрæсейаг, фæсарæйнаг æмæ нæхи ирыстойнаг зындгонд  зарæггæнджыты сурæттæ сфæлгонц кæнынмæ, райдай суанг дарæсæй,  бакастай, сæ фæзылдтытæй, кæд сын сæ зарджытæ, фонограммæ кæй хонынц, уымæ гæсгæ кодтой, уæддæр. Зын раиртасæн уыд, эстрадæйы æцæг стъалытæ æрæмбырд сты районы культурæйы Хæдзары сценæйыл  æви сæ фæзмынынмæ афтæ дæсны чи сарæхст, театр «Амыран»-ы уыцы фæсивæд сты. Иу дзырдæй, уыдысты сæ халдих.

Уæдæ концертмæ чи 'рбацыд, уыдоны «балæууын» кодтой цирчы аренæйыл дæр.

Алы номырыл дæр канд хистæртæ нæ, фæлæ залы цы бирæ сывæллæттæ уыдис, уыдон дæр æмбæлдысты æхсызгонæй. Æрмæст ацы сабитæн цы æхцондзинад æрхастой нæ курдиатджын, сæрæн уазджытæ, уый дæр арфæйы аккаг у. Æвæццæгæн, æмæ сæ хъæлдзæг, цъæхснаг хъæлæстæй худт хъуыстис суанг уынгмæ дæр. Æмæ куыд цымыдисæй кастысты артистты хъазтмæ, уый та!

Кæронбæттæны театры коллектив иууылдæр сценæмæ куы рацыдысты, уæд залы уæвджытæ сыстадысты æмæ сын сарæзтой тыхджын къухæмдзæгъд.

Нæ зæрдæ зæгъы фæсивæдон театр «Амыран»-æн ноджы стырдæр æнтыстдзинæдтæ! Макуы сын ахуыссæд Амыраны рухс,  се  сфæлдыстадон фæндагыл  æрттивгæ цæуæнт! 

Концерты тыххæй нын се 'нкъарæнтæ загътой:

Хъуылымбегты Зæлинæ — Елхоты фыццæгæм астæуккаг скъолайы ирон æвзаг æмæ литературæйы ахуыргæнæг:

— Ацы фæсивæдон театр бирæ уарзын. Курдиатджын фæсивæд сты сæ хистæртимæ иумæ. Ноджы сын фылдæр бантысæд. Уæлдай æхсызгон  мын у, абон Елхотмæ кæй æрцыдысты, сæ диссаджы архайдимæ  нæ кæй базонгæ кодтой, уый. Уæхæдæг æвдисæн, зал сын куыд æмдзæгъд кодта, уымæн. Стыр бузныг зæгъын театры æппæт коллективæн дæр!

Гæззаты Лаурæ — Цæгат Ирыстоны паддзахадон университеты фыццæгæм курсы студенткæ:

— Тынг фæцыдис мæ зæрдæмæ концерты алы номыр дæр. Диссаджы арæхстджын хъазт кодтой, кæд профессионалон артисттæ не сты, уæддæр. Сæ репертуар фылдæр расыггæнджыты ныхмæ кæй у, уый дзæгъæлы нæу, уымæн æмæ, хъыгагæн, нозты азарæй сæфынц нæ фæсивæд.

Тылаттаты Светланæ.

Къамтæ систа Тылаттаты Дианæ.