Ивгъуыд сабаты Республикæ Хуссар  Ирыстон — Паддзахад Аланийы (РХИ-ПА) сæйраг сахар Цхинвалы ацыд Æппæтдунеон æхсæнадон  змæлд «Иры Стыр Ныхас»-ы Х съезд. Уым архайдта Кировы районы делегаци дæр авд адæймагæй.

Съезды фыццаг раныхас кодтой РХИ-ПАйы Президент Бибылты Анатоли æмæ Республикæ Цæгат Ирыстон-Аланийы (РЦИ-А) Сæргълæууæг Битарты Вячеслав.

 

Ирон адæмы иудзинад фидардæр кæныны мадзæлтты тыххæй доклад скодта ÆÆЗ «ИСН»-ы координацион уынаффæдоны сæрдар Кучиты Руслан, æмдоклад та —  «Иры Стыр Ныхас»-ы Хуссар Ирыстоны хайады сæрдар Гаглойты Роберт.

Съезды ма раныхас кодтой Дзæуджыхъæуы Терчы фалейы зылды Ныхасы сæрдар Туаты Руслан, Мæскуыйы ирæтты националон-культурон центры сæрдары хæдивæг Саулохты Умар, Тырсыгомæй æмæ Хъуды комæй рацæуæг ирæтты номæй Сæлбиты Гайырбег, ÆÆЗ «ИСН»-ы  фæсивæды комитеты сæрдар Гуæцæлты Алан, РХИ-ПАйы Парламенты депутат Гæбæраты Юри, Дзæуджыхъæуы 13-æм скъолайы директор, ÆÆЗ «ИСН»-ы сылгоймæгты комитеты уæнг Сæлбиты Иринæ, Ирыстоны фысджыты цæдисы æмсæрдар Хъазиты Мелитон, Воронежы ирæтты æхсæнады сæрдар Бестауты Уырызмæг, ÆÆЗ «ИСН»-ы хистæрты уынаффæдоны сæрдар Томайты Шамил, «Иры Стыр Ныхас»-ы мыггæгты комитеты сæрдар Æгкацаты Юри. Сеппæты хъуыды дæр уыдис иу: нæ адæмы иудзинад фидар кæнынæн сæ бындур сты нæ мадæлон Æвзаг æмæ ирон Æгъдау.

Цы фарстатыл æрныхас кодтой делегаттæ æмæ хуынд адæм, уыдоны фæдыл хаст æрцыд хъæугæ уынаффæтæ.

Съезды куысты фæстæ Хуссар Иры аивады дæснытæ равдыстой зæрдæмæдзæугæ концерт.

Съезды тыххæй бæлвырддæр æрмæг мыхуыргонд æрцæудзæн газеты хæстæгдæр номыртæй иуы.

---

Нæ уацхæссæг.